...ਕੋਈ ਵੀ ਸਾਥੀ ਟੁੰਡਾ ਨਹੀਂ{ikbal pathak}

ਚਿੱਕੜ ਵਿੱਚ ਜਿਉਂ ਕਮਲ ਸਬੂਤਾ, ਰਹਿਣਾ ਔਖਾ ਹੁੰਦਾ ਨਹੀਂ |
ਆਦਮ ਮਾਲਕ ਕੁਦਰਤ ਦਾ ਹੈ, ‘ਸਾਕ’ ਕਿਸੇ ਦਾ ਬੁੰਦਾ ਨਹੀਂ |

ਕੀ ਹਸਤੀ ਹੈ, ਕੀ ਔਕਾਤ ਹੈ, ਇਹੋ ਜਿਹੇ ਸ਼ਿਕਾਰੀ ਦੀ,
ਜਿਸਨੇ ਆਦਮ ਦੀ ਕਮੀਂ ਦਾ, ਕੋਈ ਵੀ ਪਹਿਲੂ ਫੁੰਡਾ ਨਹੀਂ |

ਹਰ ਥਾਂ ਵਸਦੇ ਚੋਰ-ਉਚੱਕੇ, ਦੋਸ਼ ਦਿਓ ਨਾ ਉਹਨਾਂ ਨੂੰ,
ਜਿੱਥੇ ਤੁਸਾਂ ਨੇ ਸੁਪਨੇ ਤਾੜੇ, ਕੀ ਉਸ ਘਰ ਨੂੰ ਕੁੰਡਾ ਨਹੀਂ ?

ਰੋਟੀ ਖਾਤਿਰ ਕਿਸੇ ਨੂੰ ਲੁੱਟਣਾ, ਰੀਤ, ਕਾਨੂੰਨ ਤੁਸਾਂ ਦਾ ਹੈ,
ਕਿੱਥੋਂ ਆਪਣੀ ਪੱਤ ਬਚਾਈਏ, ਕਿਹੜੇ ਦਫ਼ਤਰ ਗੁੰਡਾ ਨਹੀਂ ?

ਅਸੀਂ ਅਖਾਉਂਦੇ ਹਾਂ ਬਾਗੀ ਪਰ, ਇੱਕ ਨਾ ਇੱਕ ਸਬੂਤ ਦਿਓ,
ਤੁਸਾਂ ਦੇ ਨੌਕਰ ਦੇ ਹੱਥ ਵਿਚ ਜੋ, ਕਿਹੜੀ ਰਫ਼ਲ ਨੂੰ ਕੁੰਦਾ ਨਹੀਂ ?

ਤੇਰੀ ਪੋਲੀ ਗੋਗੜ ਉਂਝ ਤਾਂ, ਚਾਕੂ ਸਦਾ ਹੀ ਲੋਚੇ ਹੈ,
ਜਿਸਨੇ ਢਾਲਾਂ ਸੰਗ ਟਕਰਾਉਣਾ, ਨਸ਼ਤਰ ਐਨਾ ਖੁੰਡਾ ਨਹੀਂ |

ਪੱਲਾ  ਝਾੜਕੇ ਪਾਸੇ ਹੋਣਾ, ਤੁਸਾਂ ਦੀ ਇਹ ਮਜਬੂਰੀ ਹੈ,

ਸਾਡੇ ਹੱਥ ਤਾਂ ਸਦਾ ਸਲਾਮਤ, ਕੋਈ ਵੀ ਸਾਥੀ ਟੁੰਡਾ ਨਹੀਂ |

---ਇਕਬਾਲ---
15-08-2011

ਹੁਣ ਹੋਰ ਮਸ਼ਹੂਰੀ ਨਹੀ- -ਇਕਬਾਲ ਪਾਠਕ

ਇਕਬਾਲ ਪਾਠਕ

 

ਗੌਰ ਨਾਲ ਸੁਣੋ
ਕਿ ਹੁਣ ਅਸੀਂ ਸਿਧੇ ਸਾਦੇ ਪੇਂਡੂ ਨਹੀਂ ਰਹੇ
ਸਾਨੂੰ ਪਤਾ ਲੱਗ ਗਿਆ ਹੈ
ਕਿ ਦਾਤਣ ਤੋੜਨ ਨਾਲ
ਕੁਦਰਤ ਨਾਲ ਛੇੜ-ਛਾੜ ਨਹੀਂ ਹੁੰਦੀ
ਕਿ ਕੋਲੇ ਨਾਲ ਦੰਦ ਮਾਂਜਣੇ
ਬੁਰੇ ਨਹੀਂ ਹੁੰਦੇ
ਕਿ ਦੰਦਾਂ ਲਈ ਜਰੂਰੀ ਨਹੀਂ ਹੁੰਦਾ ਹੈ
ਥੋਡਾ ਠਿਆਨੀ ਕਿੱਲੋ ਲੂਣ ਆਲਾ
ਝੱਗ ਵਾਲਾ ਕਰੇੜਾ ਲਾਹੂ ਸਾਬਣ
ਜੋ ਖਾਰ ਦਿੰਦਾ ਹੈ
ਦੰਦਾਂ ਦੇ ਖੁਰਨ ਤੋਂ ਪਹਿਲਾਂ
ਸਾਡੇ ਖੀਸੇ ਦੀਆਂ ਸਿਉਣਾ |

ਸਾਨੂੰ ਪਤਾ ਲੱਗ ਗਿਆ ਹੈ
ਕਿ ਸੁਆਹ 'ਚ ਭਿਉਂ ਕੇ ਵੀ
ਨਿਖਰ ਸਕਦੇ ਨੇ ਟੈਰਾਲੀਨ ਦੇ ਝੁੱਗੇ
ਕੋਈ ਜਰੂਰੀ ਨਹੀਂ ਹੁੰਦਾ
ਤੁਹਾਡਾ ਮਹਿੰਗਾ ਮਸ਼ਹੂਰੀ ਮਾਰਕਾ
ਕੰਧਾਂ ਤੇ ਫੇਰਨ ਵਾਲੀ ਕਲੀ ਵਾਲਾ ਸੂੜਾ |

ਅਸੀਂ ਜਾਣ ਗਏ ਹਾਂ
ਕਿ ਤੁਹਾਡੀ ਨੰਗੀਆਂ ਤੀਵੀਆਂ ਦੇ ਪਤਰੇ ਵਾਲੀ
ਖਰਸ ਪਾਊ ਟਿੱਕੀ ਨਾਲੋਂ
ਬੇਹੀ ਲੱਸੀ ਚ ਤੇਲ ਪਾ
ਲਹਿ ਸਕਦੀ ਹੈ
ਸਾਡੇ ਖੁਰੜਿਆਂ ਦੀ ਮੈਲ ਚੰਗੀ ਤਰਾਂ |

ਤੁਸੀਂ ਆਪਣੀਆਂ ਬੂਥੀਆਂ ਨੂੰ ਹੀ
ਕਰੀ ਜਾਓ ਪਾਲਸ਼
ਖੜੀਅਲ ਮਿੱਟੀ ਨਾਲ
ਤੇ ਬੁੱਲਾਂ ਤੇ ਲਾਈ ਜਾਓ
ਸੜ ਚੁੱਕੀਆਂ ਮੱਛੀਆਂ ਦੀ ਚਮੜੀ
ਸਾਡਾ ਸਾਡੀ ਚਾਟੀ ਦੀ ਮਲਾਈ ਤੇ
ਸਰੋਂ ਦੀ ਘਾਣੀ ਨਾਲ ਸਰਦੈ |

ਬੱਸ ਬੱਸ
ਹੁਣ ਹੋਰ ਮਸ਼ਹੂਰੀ ਨਹੀ |

--ਇਕਬਾਲ--