(....ਗੂੰਗਾ ਮੌਸਮ }

ਖੁਦ ਨੂੰ ਖੁਦ ਕਹਿੰਦੇ ਹੋ ਸੂਰਜ ਦੇ ਜਾਏ ਹੋ;

ਫਿਰ ਵੀ ਕਾਹਤੋਂ ਚਾਨਣ ਦੇ ਤਿਰਹਾਏ ਹੋ .

ਓ ਦਰਿਆਓ !  ਸਾਡੀ ਲੋੜ ਸੀ ਕੁਝ ਬੂੰਦਾਂ ;

ਤੁਸੀਂ ਤਾਂ ਸਾਰਾ ਸਾਗਰ ਹੀ ਲੈ ਆਏ ਹੋ .

ਕੰਡਿਆਂ ਦਾ ਬੀ ਫੁੱਲਾਂ ਵਿੱਚ ਹੀ ਪਲਦਾ ਹੈ; 

ਇਹ ਸਦੀਆਂ ਦਾ ਸਚ  ਹੈ ਕਿਓਂ ਬੁਖਲਾਏ ਹੋ .

ਮੈਨੂ ਹਰ ਪਲ ਤੁਰ ਜਾਹ ਤੁਰ ਜਾਹ ਕਹਿੰਦੇ ਸਉ;

ਤੁਰ ਚੱਲਿਆਂ ਹਾਂ ਤਾਂ ਪਿਛੇ ਕਿਓਂ ਆਏ ਹੋ .

ਸਾਡਾ ਦੀਵਾ ਜਗਦਾ ਵੇਖ ਨਾ ਜਰਦੇ ਹੋ ;

ਖੂਬ ਗੁਆਂਢੀ ਹੋ ,ਚੰਗੇ ਹਮਸਾਏ ਹੋ. 

ਚਿਹਰਾ ਦਸਦਾ ਹੈ ਕਿ ਰੁੰਨੇ ਹੋ 'ਕੇਸ਼ੀ';

ਕਿਸ ਨੂੰ ਆਪਣਾ ਦਰਦ ਸੁਨਾ ਕੇ ਆਏ ਹੋ .

ਜਨਾਬ ਹਰਦਿਆਲ ਕੇਸ਼ੀ -ਗੂੰਗਾ ਮੌਸਮ {ਪੰਨਾ ੭੫}